Filmi pisimasuinnik tunngavilik

Qimusserneq kulturitut ullumikkut suli piua imaluunniit nungukkiartuaarpa?

Arctic Nomadsip qimussertartoq inuusuttoq Nunatsinneersoq inuttaraa, taassuma qimmilerineq, piniarneq, qimminik nerisitsineq taakkuninngalu sungiusaaneq misilittagaqarfigivai. Qimussernermi Atortussat tamaasa pigai tamangajaasalu nammeerluni aamma suliarisinnaallugit. Oqaluttuullutalu takutissavaatsigut qanoq qimmilerisarnerminik. Takussavarput kia ilitsersuuttarsimaneraa aamma sooq qamuteralannik angalarujuuinnarani suli qimussertarnersoq.

Issittumi Inuit ukiorpassuarni aniguisinnaasimanerinut qimussernerup pinngortitami ukiorluttartorsuarmi pingaarluinnarsimanera ineriartortittuarneqarsimanerilu pingaaruteqarluinnarsimapput. Qimusseq piniarnermi aalisarnermilu atorneqarluartuuinnarani ungasissumut angallataavoq, tamannalu iluatsissappat qimuttut inuatalu imminnut suleqatigiilluarnerat apeqqutaalluinnartarpoq, tamannalu kinguaariinnit kinguaariinnut ingerlateqqinneqartarpoq. Ullutsinni qimmit qimuttut sakkortuumik ikiliartupiloorput, ullumikkullu takornarialerinermi turistinut kalaalerpaluttunik misigisaqarusuttunit annermik atorneqartalernikuullutik. Tamakku pillugit qimmussertartormita qanoq eqqarsaatersorpa? Ernumava, tanngassimaarpa, nukittua? Suut unammillernartut qimussertartup Issittumi ullumikkut eqqasuutigivai?

Pisimasulersaarutip ilisimasat qimussernermut tunngasut, ilitsoqqussat ineriartortitsinerlu takutippai minnerunngitsumilli Inuit qimussertartut naapeqatigiinnerat taasariaqarparput. Qimussernermi artortut atisallu Inuit nammineerlutik takutissavaat, sumullu atorneqartarneri ilanngullugit oqaluttuaralugit.

Pisimasulikkersaarut takorlooruminarsarlugu Inuit nunaanni assigiinngitsuni qimussernerup iluani assigiissutit assigiinngissutillu assilissatigut sarsuatitatigut filminit pisimasuinnit qiukkat takutinneqartassapput.

Filmip nipitaata ersersippaa nipaassuseq eqqissinerlu qimussersup misigisartagai, qimmilerinerup qanoq
nipeqarnera pinngortitarsuarmilu ingerlaarujoorneq. Nipit eqqortut pingaartippavut: Qamutit aputikkornerisa nipaat, sermikkut ujaqqatigulluunniit ingerlanerup qanoq nipeqartarneri, iperariarnerup qiarsunnera, qamutit neeqqulunneri, tamakku tamarmik qimussersumut immikkuullarissumik iluarusunnartumillu misigititseqataasarput. Qimussersup qimmiminut oqaluttarnera naalakkiisarneralu aamma pingaaruteqarluinnartuupput.Nipit qimussersup qimussernermini aniatittagai filmimi pingaarutilittut ilaalluinnarput.

Filmip nipilersuutitai Nunatsinni erinarsortartunit eqqumiitsuliortunillu ullutsinneersuupput, soorlu operamik erinarsortartumit Ida Heinrich-imit, rockertartunit Inuit Feet-ikkunnit qallunaamillu agiarsuarmik kontrabassertartumit Jakob Kragesand-imeersuullutik. Taamaasiornitsigut ersersikkusuppavut ullutsinni pisut, qimussimilu qangarsuarniit kulturitoqqameersumi ilisimasat assigiinngissutaasa ullumikkullu pissutsit qinerneqarsinnaasut imminnut naleqqiunneri.

Nioqqutissiortoq: Nebula

Allallunilu isumassarsisoq: Pipaluk Lykke Løgstrup

Ilitsersuisoq: Johannes Ujo Müller

Assiliisoq/Nipitaa/Qaamanera: Anda Hansen

Qimussertartoq inuusuttunnguaq: Navarana Lennert

Assiliartaliortoq: Ivalu Risager

Nipilersorneq: Ida Heinrich, Kristian Mikkelsen, Jakob Kragesand